ஜபம் - கவிதை

 

கொத்துக் கொத்தாக
கொள்ளுப்பேரன்களும் எள்ளுப்பேரன்களுமாக
பதினாறும் பெற்று பெருவாழ்வு வாழ்ந்து
விமர்சையாக திருக்கடையூரில்
சதாபிஷேகமும் ஆகிவிட்டது
88 வயது காமாட்சி மாமிக்கு

எல்லோரோடும் நட்ட நடுவில் 
எல்லா கல்யாணங்களிலும்
ஆத்துக்காரருடன் உட்கார்ந்து குரூப் போட்டோவும்
எடுத்துக் கொண்டாயிற்று

ஒவ்வொரு  தடவையும்
ஏதோ ஒன்றை விட்டுவிட்டு
மகா திருப்தி அடைவதுண்டு
காசிக்குப் போய் திரும்பிய போதெல்லாம்

அனாவசிய பேச்சும் கிடையாது
டீவி சிரியலும் பார்ப்பதில்லை
ரேடியோவும் கேட்பதில்லை
அனாவசிய வம்பும் நிறுத்தியாயிற்று
வெறும் காட்டன் புடவைதான்
நகைகளும் துறந்தாயிற்று

சும்மா இருக்கும் நேரத்தில்
ராமா கிருஷ்ணா கோவிந்தா
ஜப மாலையை உருட்டியபடி
காலத்தை கழித்தாலும்
 
இதையெல்லாம் விட்டிருக்க வேண்டாமே
என்றும் நெருடுவதுண்டு
ஜப மாலையின் வரிசையில்
9,10,11,12 ருத்ராட்ச கொட்டைகளை
உருட்டி ஜபிக்கும்போது