நாலாவது மாடியில் ஆர்த்தி

கரண்டி,பென்சில்,பொம்மை
ரீமோட்,டார்டாய்ஸ் காயில்
டம்ளர்,சாவிக்கொத்து,பவுடர் டப்பா
கட்டை சீப்பு என கையில் கிடைத்த
எல்லாவற்றையும்
கிழே தூக்கிப்போட்டு
ஆவலுடன் பார்க்கிறது
மூன்று வயது ஆர்த்தி
நாலாவது மாடி ஹால்
ஜன்னலில் இருந்து

ஆர்த்தி எதிர்பார்த்தபடி
 
வளைந்தும் உடைந்தும்
திரும்பி வந்துவிடுகின்றன
மீண்டும் நாலாவது மாடிக்கே

ஒன்று மட்டும் வருவேதேயில்லை

அதே ஜன்னல் வழியாகத்தான்
தன்  கண் முன் விழுந்தது
சாவிக் கொத்துபோல் சொத்தென்று

அம்மா