குறும்பட விமர்சனம்-7-11-10-கலைஞர் டிவி

கலைஞர் டிவியின் நாளைய இயக்குனர்  நிகழ்ச்சியில் இந்தவாரமும் கல்லூரிக் கதைகள்.

ஒவ்வொரு குறும்பட முடிவிலும் நடுவர் பிரதாப்போத்தன் என்ன சொல்லி கிழிக்கப் போகிறார் என்ற பீதி இயக்குனரின் முகத்தில் தென்படுவது சுவராஸ்யம்.

குறும்படங்கள் ஒன்றுக்கொன்று சவாலானதாக இருப்பது வரவர குறைந்துவிட்டது.

போனவாரம் 31-10-10

படம்:Samaritan இயக்குனர்: தீபன்

உண்மை சம்பவத்தின் அடிப்படையில் எழுதப்பட்ட கதை என்று தலைப்பில் போடப்படுகிறது.

கல்லூரி மெஸ்ஸில் வேலை செய்யும் ஒரு இளைஞன் தன் சுய முயற்சியால் படித்து பட்டம் வாங்கினவன்.தன் அப்பாவிற்கும் படிப்பு சொல்லிக்கொடுத்தவன். அதே மாதிரி ஏழைகள் முதியோர்களுக்கு படிப்புச்சொல்லித்தர ரொம்ப ஆர்வமாக இருக்கிறான்.முதலில் கல்லூரி மாணவர்களுக்கு கிளாஸ் எடுக்கிறான்.அவனுடைய ஆர்வப்பொறி அந்த கல்லூரி மாணவர்களுக்கும் பற்றிக்கொள்கிறது.அவர்கள் முதியோர் மற்றும் ஏழைகளுக்கு கல்வி கற்றுத் தர தொடங்குகிறார்கள்.கல்லூரி நிர்வாகம் சந்தோஷப்படுகிறது.

அந்த பையனுக்கு Good Samaritan விருது வழங்கப்படுகிறது.

அருமையான படபிடிப்பு.உறுத்தாத நடிப்பு.கல்லூரி வாழ்க்கையில் பாசிட்டீவ் எண்ணங்கள்.வாழ்த்துக்கள்!

கதை?ஆவணப்படம்?

மாணவர்கள் ஏழைகளுக்கு படிப்பறிவு கொடுப்பதை முதலில் காட்டி இந்தப் பொறி இவனிமிருந்துதான் வந்தது என்று கடைசியில் மெஸ் பையனைக் காட்டி இருக்கலாமோ?

Good Samaritan என்பவர்  கஷ்டத்தில் இருக்கும் முன்பின் தெரியாத ஒருவருக்கு தன்னிச்சையாக உதவி புரிபவர்.இதில் சுயநலம் கிடையாது.இது பைபிளில் வருகிறது.

ஆனால் இந்தக் கதைக்கு இந்த டைட்டில் பொருந்தவில்லையே?

படம்:என் இனிய பொன் நிலவே இயக்குனர்:அருண் ராஜா காமராஜ்

அரசு பள்ளியில் தமிழ் மீடியம் படித்த திக்குவாய் பிரச்சனை உள்ள ஒரு இளைஞன் கல்லூரியில் சேருகிறான்.பாடங்கள் புரியவில்லை.ஆசிரியர்கள் பேசும் ஆங்கிலத்தைப் பின்பற்ற முடியவில்லை.படிப்பு ஏறவில்லை  என்ற தாழ்வு மனப்பான்மை அவனை குடிக்கொள்கிறது.

அதற்காக தினமும் படிப்பதற்க்கு கல்லூரி நூலகத்திற்க்குச் செல்கிறான். அங்கு ஒரு அழகான பெண்ணை சந்திக்கிறான்.தேவதை மாதிரி இருக்கிறாள்.
அவளும் அவனிடம்  தினமும் பேசுகிறாள்.படிப்பு வரா விட்டாலும் காதல் வந்துவிடுகிறது.

அவள் உடுத்தும் உடைகள் சரோஜா தேவி காலத்து  உடைகள்.ஏன் என்று புரியவில்லை.

தன் காதலை ஒரு நாள் அவளிடம் சொல்கிறான்.அவள் சிரிக்கிறாள்.தனக்கு குறை இருப்பதால்தான் அவள் காதலிக்க விரும்பவில்லை என்று உரக்கச் சொல்கிறான்.அவள் மறுபடியும் சிரிக்கிறாள்.அப்போது நூலக மேலாளர் “என்னப்பா தனியா பேசிட்டு இருக்கே” என்று கேட்க.” சார்.. இங்க ஒரு பொண்ணு இருக்காங்களே..” என்று சொல்ல மேலாளர் அதிர்கிறார்.

இப்போது நூலகம் இருக்கும் இடத்தில் 40 வருடத்திற்கு முன்பு ஒரு மருத்துவமனை இருந்ததாகவும் நூலக இடத்தில் மார்சுவரி(பிண கிடங்கு)இருந்ததாகவும் சொல்கிறார்.நூலகத்தில் ஆவி நடமாட்டம் இருப்பதாகவும் சொல்கிறார்.

சொல்லிய விதம் அருமை.இசையும் அருமை.திக்குவாய் பையனாக நடித்த மணிகண்டன்  நடிப்பு சூப்பர்.அங்காடித் தெரு மகேஷ் சாயல்.படத்தில் இவர் பெயர் மகேஷ்.இவர்தான் வசனமும் எழுதினாராம்.

பாலச்சந்தருக்கு இவரை ரொமப பிடித்துப் போய் இவரை சந்திக்க வேண்டும் என்றார்.

ஆவியை ஒரு தேவதைப் பெண்ணாக காட்டி இருப்பது புதுமை.அந்தப்பெண் வரும் காட்சிகளில் புகை மூட்டத்தில் காட்டி அன்னியப்படுத்தி இருக்கவேண்டாம்.க்ளிஷே?

கடைசி வசனத்தில் திக்கு வாய் போய்விடுவதாக மதன் சொன்னார். நான் கவனிக்கவில்லை.முடிவு செயற்கையோ?

Birds of the same feather flock tegether.(இனம் இனத்தைதான் சேரும் ?) இதற்கும் இந்தப் படத்திற்கும் என்ன சம்பந்தம்.ஆட்டோ பின்னால் எழுதப்படும் அசட்டு வாசகம் போல்?

படம்:வசந்தி இயக்குனர்:சுப்பராஜ்

பேராசிரியர் வசந்தி  கண்டிப்பானவர்.கையில் பிரம்புதான் இல்லை.தன் மாணவர் கொடுக்கும் பிராஜெக்ட் அவன் சுயமாக செய்தது இல்லை என்று கண்டுகொள்கிறாள். அவன் அப்பாவை வரவழைக்கிறாள்.அவர் வசந்தியின் முன்னாள் காதலன்.

வீட்டோடு மாப்பிள்ளை மற்றும் தன் பிராஜெக்ட் முடிக்கும் வரை திருமணம் கிடையாது என்பதால் அவரின் காதல் கைக்கூடவில்லை. அந்த பழைய பிராஜெக்ட்தான் மகனுக்குக் கொடுத்தது.அவளுக்கு அந்த பிராஜெக்ட் பிடித்து விடுகிறது.

மிச்சமிருக்கும்  காதல் ஹாங் ஓவர் துளிகளினால் அதிரடி அனுமதி கிடைக்கிறது.மகிழ்ச்சி பிரவாகமாக ஓடுகிறது.

ஆனால் வெளியில் மாணவனிடம் கைக்குலுக்கிய பெண்ணிடம் சீறுகிறாள்.அவள் அப்படித்தான்?அந்தப் பெண் வசந்தியின் தங்கை?

ஓகே ரகம்.வணிக பத்திரிக்கைக் கதைபோல் இருக்கிறது.வசந்தியின் நடிப்பில் நாடகத்தனம். இசை  வசனங்களை இம்சை படுத்தியது.காதலர்கள் சந்தித்தால் பின்னணியில் ” சங்கத்தில் காணாத கவிதை” பாட்டு.காதல் மறுக்கப்பட்டதும் ”என்னடி மீனாட்சி சொன்னது என்னாச்சு”.இறந்துபோனால் “வீடுவரை உறவு காடுவரை”யா? டி.ராஜேந்தர் & பாக்கியராஜ் அசட்டுத்தனம்.

மாத்தி யோசிங்கப்பா? இது ”நாளைய” இயக்குனர. ”நேற்றைய” இயக்குனர அல்ல.எல்லாம் வசந்திதான் என்ற வகையில் “வசந்தி” தலைப்பு ஒரு அழுத்தமான குறியீடு.

படம்:பூமராங் இயக்குனர்:அருண் பிரசாத்

தன் வினை தன்னையே சுடும்.மூல சூடு பேராசரியருக்கு ஒரு மாணவன் செய்யும் வினை திரும்ப அவன் மேலே பூமராங் ஆகிறது.அவன் செய்வது அப்படி ஒன்றும் பெரிய வினை மாதிரி தெரியவில்லை.

கடைசியில் புரியவில்லை.இன்னும் கூட நன்றாக கன்வின்சிங்காக சொல்லி இருக்கலாம்.மையம் அழுத்தமாக இல்லை.ஓகே ரகம்.

ஆச்சரியம் ஒன்று.இதில் பேராசிரியராக நடித்தவர் “பதினாறு வயதினிலே” படத்தில் டாக்டராக வரும் சத்யஜித். பாத்திரத்திற்கு பொருந்துகிறார். இன்னும் அதே தமிழ்தான் பேசுகிறார்.வட இந்திய பேராசிரியர் ?

சிற்ப்பு படம்: என் இனிய பொன் நிலாவே.எந்த படமும்  இந்த வாரம் வெளியேற்றப்படவில்லை.

நாளைய இயக்குனர் -குறும்பட விமர்சனம் - 31-10-10

இந்த வாரம் “கல்லூரிக் கதைகள்”. கல்லூரிக்குள் நிகழும் சம்பவங்களை அடைப்படையாக வைத்து.இயக்குனர்களின் செல்ல சப்ஜெக்ட் ஆச்சே புகுந்து விளையாடுவார்கள் என்று பார்த்தால் ஆரம்பமே சரியில்லையே??

ஒன்றுதான் தேறுகிறது.

போன வாரம்-24-10-10
 

படம் எடுப்பதை சீரியஸ்ஸாக எடுத்துக்கொண்டு இயக்குமாறு மதன் சார்,பிரதாப் போத்தன் சார் அறிவுரையோடு ஆரம்பித்தார்கள்.

படம்: DSP  இயக்குனர்: N.S.ராகேஷ்

கல்லூரியில் Digital Signal Processing என்ற சப்ஜெக்டில் தேறுவது மாணவர்களுக்கு கஷ்டமாக இருக்கிறது.அதில் சந்தோஷ் என்ற ஹீரோவும் அடக்கம்.பிட் அடித்துதான் பாஸ் பண்ண முடியும்,அதாவது  DSP யை அடக்கி கைக்குள் கொண்டு வரமுடியும் என்கிறான், ஹீரோவின் தம்பி சுரேஷ். ஆனால் அண்ணனுக்கு அதில் துளியும் இஷ்டமில்லை.

இரண்டு பேரும் இரட்டையர்கள். அண்ணனுக்குப் பதிலாக தம்பி போய்  பிட் அடித்து பரீட்சை எழுதி (எல்லோருக்கும் அதை விநியோகித்து)  பாஸ் செய்ய வைக்கிறான்.தம்பி உடையான் படைக்கு அஞ்சன்?

எடுப்பு தொடுப்பு முடிப்பு என்று சுவராஸ்யமாக இல்லையே?DSP என்னவென்று சில நிமிடங்கள் சஸ்பென்ஸாக வைத்து பின் சொல்கிறார்கள்.அதிலும் அவ்வளவு கெத்து இல்லையே?

ஓகே ரகம். நிறைய ஹோம் வொர்க் பண்ணுங்க இயக்குனர் சார்.

படம்: ஹீராதி ஹீரோ  இயக்குனர்:ஸ்ரீமணிகண்டன்

தன் நண்பர்களுக்கிடையே தன்னை ஹீரோவாக காட்ட வேண்டும் என்று மூன்று பேர் உதார் விட்டு ஹீரோ ஆவதுதான் கதை.உண்மையில் ஜீரோ எல்லோரும்.

இதுவும் சுமாரான படம்.

படம்: ரெண்டு இட்லி ரெண்டு வடை இயக்குனர்:அருண்குமார்

ஒரு சில கல்லூரி ஹாஸ்டல் மாணவர்களுக்கும் அதே கல்லூரியின் மெஸ்ஸின் சமையற்காரர் அழகர் பிள்ளைக்கும் உள்ள பாசப்பிணைப்புதான் கதை.இவர்க்ள் கொடுக்கும் தொல்லைகளை பெத்த அம்மாவைப் போல் எடுத்துக்கொள்கிறார்.

அழகர் பிள்ளை  தன் நீண்ட நாள் சேமிப்பை வைத்து அந்த மாணவர்களை ஒரு இக்கட்டில் இருந்து காப்பாற்றுகிறார். அந்த சேமிப்பு தன் பேத்திக்கு ஒரு செயின் வாங்குவதற்காக வைத்திருந்தது. மாணவர்கள் நெகிழ்கிறார்கள்.

அதே செயின் பணத்தை அவருக்கு செயினாகவே திருப்பிக்கொடுக்கிறார்கள்.அவரும் நெகிழ்கிறார்.

கதையை  சொன்னவிதம் நன்றாக இருந்தது. சமையற்காராக நடித்த முருகன் என்பவரின் நடிப்பு  அட்டகாசம். அவர் குரலும் அருமை.யதார்த்தம்.”உங்க அம்மா சோறு போட்டிருந்தா... இப்படித்தான் தண்ணியடிச்சிட்டு வருவீங்களா” வசனம் நன்று. படபிடிப்பும் யதார்த்தமாக இருந்தது. 

இந்தப்படத்தை 70% இவர்தான் தாங்குகிறார்.நடுவர்கள் இருவரும் இதைப்பற்றி ஒரு வார்த்தைக் கூட சொல்லவில்லை.

அந்த மாணவர்கள் கல்லூரி முடிந்து வேலையில் செட்டிலாகி இவருக்கு கடிதம் எழுதுகிறார்கள் .இவர் கையில் கடிதம் இருக்க பின்னணியில் இவர்கள் எல்லோரும் படிப்பதுமாக எடுத்திருப்பது அருமை.இதை மதனும் குறிப்பிட்டார்.


இந்த வாரம் சிறப்புப் படமாக தேர்ந்தெடுக்கப்பட்டது “ரெண்டு இட்லி ரெண்டு வடை”

சிறந்த நடிப்புக்காக முருகனும் பரிசு பெற்றார்.

படம்:வேகம் உண்டு விவேகம் இல்லை இயக்குனர்:சந்திரன்

இயக்குனர் ஒருவருக்குத்தான் இதன் கதை என்னவென்று தெரியும்.

குறும்பட விமர்சனம்/நாளைய இயக்குனர்/ (10-10-10)

இந்த வாரம் ஆரம்பிக்கும் போதே  நடுவர்கள்,  எடுக்கும் குறும்படங்களில்“out of box thinking" "lateral thinking, இருக்கனும் என்று ஆரம்பித்தார்கள். ஆனால் படங்கள் படு சொதப்பல். ஒன்றைத் தவிர மீதி குறும்படங்கள் ”வெத்து” படங்கள் ஆகிவிட்டது.

 

போன வாரம் 3-10-10

படம்: “காதல் கடிதம்” இயக்குனர்:சரத் ஜோதி

அருணுக்கு மது மேல் காதல். காதலைச் சொல்ல குறுஞ்செய்தி/இமெயில்/ பேஸ் புக் போன்றவைகளை பயன்படுத்தாமல் தாளில் தன் கைப்பட கடிதம் எழுதி காதலை தெரிவுபடுத்துவதுதான் காதலின் மதிப்பு என்று நினைத்து எழுதுகிறான்.

எழுதிமுடித்தவுடன் கடிதம் ஜன்னல் வழியாக பறந்துபோய்விடுகிறது. மிகுந்த வருத்தமடைகிறான். அப்படியே பறந்து  ஒரு சிறுவன்/சிறுமி/கோணி விற்பவன்/பூக்காரி/ மதுவின் அம்மா   மூலமாக மதுவின் பெட்ரூம் டேபிளுக்கு வருகிற்து.( பூ வாங்க வரும்  மதுவின் அம்மாவிற்கு பூக்காரி அதில் பூவை வைத்து கொடுப்பதால்).அப்போது அவளும் தன் காதலைச் சொல்ல ஒரு கடிதம் தன் கைப்பட எழுதிக்கொண்டிருக்கிறாள்.

இடையில் அதைப் பார்த்துவிட்டு இன்ப அதிர்ச்சியாகி தன் கடிதத்தை கசக்கி விடுகிறாள். நேரில் பார்த்து தகவலைச் சொல்கிறாள்.தன் காதலையும் சொல்கிறாள். அவனும் இன்ப அதிர்ச்சி. காதல்தான் கைக்கூடி விட்டதே என்று கடிதத்தை “பொக்கிஷமாக” பாதுகாக்காமல்  ரோடில் குப்பையாக போட்டுவிட்டு கைக்கோத்து நடக்கிறார்கள்.

காதல் கடிதம் சாதல் கடிதம் ஆகிவிடுகிறது.

குறுஞ் செய்தி காலத்தில் காதல், கடிதத்தில் சொல்லப்படுவது புதுமை. ஒரு ஐடியல் அல்லது பெண்டசி சம்பவத்தைச் சொன்ன விதம் நன்றாக இருந்தது.
இசையும் அருமை.

கிராபிக்ஸ்ஸில் கடிதம் பறப்பது செயற்கையாக இருந்தது.கிராபிக்ஸ்ஸால் யதார்த்தம் நீர்க்கிறது.படிக்கும் போது  கடிதத்தில் முகம் தெரிவது எல்லாம் 1965ல் வந்துவிட்டது.

 பிடித்திருந்தது.

இதுதான் இந்த வார சிறப்புப் படமாக தேர்ந்தெடுக்கப்பட்டது.

 படம்: “யமுனா” இயக்குனர்:அருண்வரதன்

ஒரு பாலியல் தொழிலாளியின் காதல். கதை புரியவில்லை.சொதப்பல் இயக்கம்.மட்டமான திரைக் கதை.மலையாள இயக்குனர். கேரக்டர்கள் மலையாளத்தில் முணகுகிறார்கள்.செட்டிங்ஸ் நன்று.

பாலியல் தொழிலாளி என்றாலே வாயில் வெத்தலபாக்கு குதப்பனமா?

படம்: “பூஜ்யம் ஒன்று” இயக்குனர்:எம்.எஸ்.ஸ்ரீகாந்த்

இது எந்திரன் காதல்? ஹரிஷ் பிரியாவைக் காதலிக்க ஆனால் அவள் காதலை ஏற்றுக்கொள்ளவில்லை.தான் உருவாக்கிய “ஹல்” என்ற பெயருடைய பேசும் கம்புயூட்டரை  ப்ரியாவை எப்படி கவருவது என்று கேட்கிறான். அவளுக்கு காதல் கவிதைகள் பிடிக்கும் எழுதிக் கொடு என்கிறது.

ஆனால் இவனுக்கும் கவிதைக்கும் 1000 மைல் இடைவெளி.அதனால் அதுவே எழுதிக் கொடுக்கிறது.தான் எழுதிய கவிதையாக கொடுக்கிறான். படித்துவிட்டு  காதலாகிறாள் ஹரிஷ் மீது.

தினமும் கவிதை எழுதிக்கொடுத்து ஒரு கட்டத்தில்  இதுவும் ப்ரியா மேல் காதல் கொள்கிறது.அவன் திருமணம் செய்துக்கொள்ள உத்தேசித்தவுடன் இது தன்னை ஷார்ட் சர்க்கீயூட் செய்து விட்டு காதல் தோல்வியில் இறந்து
விடுகிறது ஹல்.எந்திரன் மனிதனை திருமணம் செய்ய முடியாது என்பதால்.

இறப்பதற்கு முன்  500 கவிதைகள் எழுதிக்கொடுத்துச் சாகிறது.ஹரிஷ் சொச்ச நாளை ஓட்டுவதற்கு?அவளுக்கு பொய் சொன்னால் பிடிக்காதாம்?தெரிந்தால் ஹரீஷ்   ஆல்சோ ஷார்ட் சர்க்கீயூட்?

ஓகே ரகம்.  சுட்டுவிட்டதாக நடுவர் பிரதாப் சொன்னார்

ஹரிஷ் காதல் முயற்சி செய்யும்  கட்டத்தில் “வர வர உன் மேல கோபம் கூட வர மாட்டேங்குது” என்று ப்ரியா சொல்வது யதார்த்தமான நகைச்சுவை.

 படம்: “மன்னிப்பாயா” இயக்குனர்:பாலா

சர்ச்சில்தான் காதல் ஆரம்பிக்கிறது.நாயகன்  கரோலின் (?) என்ற பெண்ணைக் காதலிக்கிறான்.அவளும் ஓகே.  (இருவரும் கிறிஸ்துவர்கள்). ஆனால் அவள் வீட்டில் நாட் ஓகே.அதனால் அவளுக்கு வேறு இடத்தில் திருமணம்.

இரண்டு வருடம்  கழித்து  அதே சர்ச்சில் சந்திக்கிறார்கள்.மறுபடியும் ஐ லவ் யூ என்கிறான். ஏன் என்றால் அவன்  “மனதில் பட்டதைச் சொல்பவனாம்”.
இன்னும் அவளை காதலிக்கிறானாம். Do you want chicklets? என்கிறாள். படம் முடிகிறது.

கோயில் பிரகாரத்தில்  நிறைய காதல் பார்த்தாயிற்று.இதில் சர்ச் பிரகாரம்.அருமை அண்ட் வித்தியாசம்.படபிடிப்பு நன்றாக இருந்தது.இசை நன்று.

மனதில் படம் ஒட்டவில்லை.படத்தில் சுத்தமாக ஆழம் இல்லை.எமோஷன்ஸ் இல்லை.நாயகி வசனத்தை ஓப்பிக்கிறார்.கதாநாயகன் கடுமையாக உடற்பயிற்சி செய்கிறார்.ஆனால் சிகரெட் பழக்கம் உண்டாம். காதலிக்கு சிகரெட் பிடிக்காது ஆனால் அவள் சூயிங்கம் மெல்லுகிறாள்.

கதாநாயகன் ரொமப spontaneousஆம். அதைச் சுற்றி கதை? பரம மண்டலத்தில் இருக்கும் பரம பிதாவே இவர்களை மன்னியுங்கள்!

படம் போட்டியிலிருந்து எலிமினேட் செய்யப்பட்டது.

குறும்படம்/நாளைய இயக்குனர்/ (3-10-10)

இந்த வாரத்திலிருந்து போட்டி ரவுண்ட்  ஆரம்பிக்கிறது.

இந்த வாரத் தலைப்பு ”காதல்”.  இயக்குனர்கள் எல்லோருக்கும் பிடித்த Genre. காரணம் எல்லோரும் இளைஞர்கள்.இப்படி இளைஞர்களாக இருப்பதால் “மேன்சன்/பிகரு/தண்ணீ/சிகரெட்/லூசுத்தனமான  விடலைக் காமெடி” என்று கதைகள் சுற்றி வருவதும் அடிக்கடி நடக்கிறது.

சில விஷயங்களை அழுத்தமாகச் சொல்ல வேண்டும்.

 போன வாரம்-1
 போன வாரம்:-2



இந்த வார ஆரம்பப்  படமே அசத்தல்.

படம்: கல்லறை இயக்குனர்: தமிழ் சீனு

காதலில் தகவல் இடைவெளி (communication gap) வந்து ஒரு காதலையும் ஒரு நணபனையும் இழக்கிறான் ஒரு இளைஞன்.இதுதான் கதை.

விஜய்க்கு தன் ஆபிசில் வேலைப் பார்க்கும் சுஜியின் மேல் காதல். அவள் பிறந்த நாள் அன்று ஒரு பூச்செண்டுடன் அதை அவளிடம்  சொல்ல அவள் வரும் வழியில் நிற்கிறான். ஆனால்  அதற்கு முன் அவன் நெருங்கிய நண்பன் மது அதே வழியில் மோட்டர் சைக்கிளில் வந்து  அவளுக்கு பூச்செண்டு கொடுத்து பில்லியனின் ஏற்றிக்கொள்கிறான்.

சுஜி சிரித்தபடி ஏறிக்கொள்கிறாள்.பார்த்துவிட்டு விஜய்  ”முடிஞ்சது” என்று நொந்து போகிறான்.காதல் தோல்வி.

ஆனால் கதை வேறு.மது ஒரு பிரெண்டாகத்தான் பூச்செண்டைக் கொடுக்கிறான். சுஜிக்கும் விஜய் மேல் காதல்.இரண்டு நாள் கழித்து சுஜி இதை விஜய்யிடம் தெரிவிக்குமாறு மதுவிடம் சொல்கிறான். மது ரொம்ப ஆசையாக ரயில்வே டிராக் அருகே  விஜய்யைப் பார்த்து “ டேய்... ஒரு முக்கியமான விஷயம். மது..” என்று ஆரம்பித்து முடிக்காமல்  ஒரு ரயில் மோதி மது சாகிறான்.

அவன் காதலைத்தான் ஆசையுடன் சொல்ல வந்து செத்ததாக நம்புகிறான் விஜய்.மதுவின் கல்லறையில் பூச்செண்டு வைத்து அஞ்சலி செலுத்திஒரு வசனம் (எனக்கு மறந்தவிட்டது) பேசுகிறான். நண்பன் மது ஆசைப்பட்டு
விட்டதால் சுஜி மேல் காதல் இல்லை என்பது மாதிரி வசனம்.அதே சமயத்தில் பூச்செண்டு வைத்து அஞ்சலி செலுத்த வரும் சுஜியின் காதில் இது மட்டும் விழுகிறது. அவளும் தன் காதல் தோல்வி என்று எண்ணுகிறாள்.

காதலும் கல்லறைக்குப் போகிறது தகவல் இடைவெளியால்.

கேமராவில் சொல்லப்பட்ட ஒரு காதல் கவிதை கல்லறை. ஓபனிங் ஷாட்டே அருமை.லோகேஷனே கதையில் ஒன்ற வைக்கிறது.அபூர்வமாக ஆபிஸ் காதல் கதை.குழப்பமில்லாமல் தெளிவான கதைச் சொல்லல்.இசையும் அருமை.நடித்தவர்களும் அருமை.

காதல் வெற்றியை விட காதல் தோல்விதான் சுவராசியமோ?

ரயில் விபத்துதான் சற்று செயற்கையாக இருந்தது போல ஒரு நெருடல்.வேறு விபத்து வைத்திருக்கலாம். முடிந்தவுடன் டைட்டில் கார்டில் ஓடும் இயக்குனரின் பாரதிராஜா டைப் வரிகள் எதற்கு? 

இந்தப் படம் சிறந்ததாக தேர்ந்தெடுக்கப்பட்டது.

படம்: என் அப்பாவின் காதல் இயக்குனர்:மகேஷ் பெரியசாமி

ஒரு காதலி,  முன்னாள் விளையாட்டுக் காதலை, இன்னாள் காதலினிடம் சொல்ல இன்னாள் 'get lost" இனிமே என் கண்ணில் முழிக்காதே என்று காதலை கட் செய்துவிடுகிறான்.

தன் அப்பாவிடமும் சொல்கிறான்.

தன் அம்மாவும் முன்னாள் காதல் ஒன்று இருந்து அது சந்தர்ப்பவசத்தால் தோல்வியாகி அப்பாவை கல்யாணம் பண்ண வேண்டிய சூழ்நிலை என்று  தன் அப்பாவின் மூலம் தெரியவருகிறது. அதிர்கிறான்.எப்படி பொறுத்துக்
கொண்டீர்கள் என்கிறான்?

தான் இன்னும் அவளைக் காதலித்துக்கொண்டிருப்பதால் என்கிறார் அப்பா.

தன் தவறை உணர்ந்து காதலிக்கு போன் செய்து மீண்டும் காதல் தொடரும் என்கிறான்.

இதுவும் சிறப்பாக எடுக்கப்பட்டிருந்தது.(அம்மா போன் பேசும்போது கதவை மூடும் இடம்) சில நடிகர்கள் சின்னத் திரையில் பார்த்தவர்கள்.அப்பாவாக நடித்தவர் அருமை.

எனக்குப் பிடித்திருந்தது.அம்மாவின் காதல் என்று இல்லாமல் அப்பாவின் காதல் டைட்டில் அருமை.

குறும்படத்திற்கு எதற்கு professional நடிகர்கள்?

படம்:காதலுக்குப் பொய அழகு இயக்குனர்:பிரின்ஸ்

உண்மைச் சொன்னால் காதலிக்க முடியாது என்று,”காதலுக்குப் பொய அழகு” என்று பொய் சொல்லி இளைஞன் நிறைய பெண்களை காதலிக்கிறான்.அவன் சொல்லும் பொய்கள் “தண்ணீ அடிக்க மாட்டேன்” “ சிகரெட் குடிக்க மாட்டேன்”என்பன.

இதையேதான்(????) எல்லாம் பெண்களும் கேட்டுக் காதலிக்கிறார்கள்.சாயம் வெளுத்தவுடன் அறைகிறார்கள்.

“காசு நாந்தான் கொடுக்கனமோ?” என்ற இடமும் அடுத்து அவன் நண்பன் மேல் அறை விழுவதும் ரசிக்க வைக்கும் நகைச்சுவை.லூசுத்தனமான நகைச்சுவையை விட்டு கொஞ்சம் புத்திசாலித்தனமான நகைச்சுவை யோசிக்கலாம்.

ஓகே ரகம்.நடுவர்களால் கடுமையாக ஒதுக்கப்பட்டப் படம்.

படம்:சார்... கதை கிடச்சாச்சு இயக்குனர்:மணிவண்ணன்

பட சான்சுக்குகாக ஒரு துணை இயக்குனர் பல காதல் கதைகள் சொல்லி எல்லாம் ரிஜெக்ட் ஆகி கடைசியில் தன் சொந்தக் கதையை சொல்கிறான் ஒரு தயாரிப்பாளரிடம்.தன்னை யாராவது காதலிக்க வேண்டும் என்று பின்நவினத்துவமாக “ பார்க்கில் அழுதபடி” இருக்க ஒரு பெண் பரிதாபம் கொண்டு விவரம் கேட்கிறாள்.அவனுக்கு கவுன்சிலிங் பண்ணி முடித்தவுடன் ஐ லவ் யூ என்கிறான். சொன்னவுடன் அவள் “Chase your dreams not girls" என்று கிளம்பியவுடன்  இவனுக்கு love at first speechஆகி விடுகிறது.

 தயாரிப்பாளருக்குப் பிடித்துப் போய் ஓகே என்கிறார். ஆனால் கதை பாசீட்டீவ் ஆக முடிக்க வேண்டும் என்கிறார்.எப்படி முடிப்பது என்று யோசிக்கையில் “முடிக்கலாம்” என்று வெளியே வருகிறாள். அவள் இந்த தயாரிப்பாளர் மகள்.

”சார்... கதை கிடச்சாச்சு” என்கிறான்.ஒரு கல்லில் இரண்டு மாங்காய்.

எனக்குப்பிடித்தது. முடிவை சுலபமாக யூகிக்கலாம். பழைய குமுதம் கதை.

பின்னணியில்  இவர் குரலில் கதை சொல்ல இப்படத்தின் விஷுவலாக ஓடுகிறது. பெரிய கொடுமை ஆடியோ சரியாகவே இல்லை.இயக்குனரே ஹீரோவாக நடிக்கிறார்.

விஷுவலாக படத்தைச் சொல்லத் தெரியாதவர்கள்தான் பின்னணியில்   கதை சொல்லுவார்கள் என்று நடுவர் பிரதாப் போத்தன் ஒரு அடி அடித்தார்.

அவன்,அவர்கள், அது....குறும்படம்-26-09-10

போன வார (26-09-10)  குறும்பட விமர்சனத்தில்  திடீர் பவர்கட்டினால் ஒரு படம் பார்க்காமல் போய்விட்டது. அது இப்போது யூ டூப்பில் ஏற்றப்பட்டு விட்டதால் அதைப் பார்த்து எழுதும்படி இயக்குனர் ஆர்.ரவிக்குமாரின் நண்பர் எனக்கு பின்னூட்டம்  அந்த விமர்சனப் பதிவில் இட்டிருந்தார்.

 அந்த பின்னூட்டம்:

 ARK.SARAVAN said...(1-10-10)11.53 a.m.
 Nenga miss panuna Helmet Padam youtubela  
vanthuruku pathutu vimarsanam podunga.  
athu en nanbarina padam than nanri..

இனி விமர்சனம்:

படம்: அவன்,அவர்கள், அது இயக்குனர்: ஆர்.ரவிக்குமார்

(இது ஒரு பிரபல (கே.ஹெச்.கே.கோரி) எழுத்தாளரின் கதை.அவர் அனுமதியுடன் சுருக்கப்பட்டு எடுக்கப்பட்டதாக தகவல்)
 
வீடியோ இணைத்திருப்பதால்  வழக்கம் போல  விலாவாரியாக கதைச் சுருக்கத்தைத் தரவில்லை.
 
ஹரி என்ற இளைஞனுக்கு “ஆவி மற்றும் ஆவியுடன் பேசுதல்” போன்ற விஷயங்களில் ஆர்வம் அதிகம். அவன் தன் நணபர்களை அவர்கள் ரூமில் சந்தித்து ஆவியுடன் எப்படி பேசுவது என்று ஒரு ஷீட்டை வைத்து முக்கால் வாசி விளக்கும் போது நிறுத்தி,சினிமா டிக்கெட்டை (அன்றைய ஈவினிங் ஷோ) மறந்து விட்டது ஞாபம வந்து, எடுத்துவர கிளம்புகிறான்.

அவன் வரும் வரைக்கும்  இதை எதுவும் செய்யக்கூடாது என்று சொல்லிவிட்டு கிளம்புகிறான்.

ஆனால் நண்பர்கள் ஆர்வத்தில் அதை தொடருகிறார்கள். பயம் கலந்த ஆர்வத்துடன் அதே ரூமில் இருக்கும் ஆவியுடன், செத்த நேரம்,எப்படி செத்தது,ஏன் செத்தது என்று வருகையில் கடைசியில் ஆவியின் பெயர் கேட்க “ H..A..R..I" என்ற எழுத்துகளில் நகர்ந்து நின்றதும் அதிர்கிறார்கள்.

ஆமாம் ஹரிதான். டிக்கெட் எடுக்கப் போன ஹரி  மோட்டர் சைக்கிள் விபத்தில் இறந்துவிடுகிறான்.

இனி என் விமர்சனம்:

ஆரம்பிக்கும் முன் தொகுப்பாளினி கீர்த்தி முந்திரிக்கொட்டையாக படத்தின் டைட்டில் பற்றி இயக்குனரிடம் கேட்டதை விட வேண்டும்.  ஏன்? பார்ப்பவர்களை influence செய்யும்.சுவராசியம் போய்விடும்.

ஒரு குறும்படத்திற்கென்றே அற்புதமான வித்தியாசமான கதை.திகில்,ச்ஸ்பென்ஸ்.திருப்பம் நிறைந்த கதை.கச்சிதமாக சுருக்கப்பட்டுள்ளது.

டைட்டிலே வித்தியாசமாகக் காட்டப்படுகிறது. ரூமில் தொங்கும் காற்றில் கிணுகிணுக்கும் மணியும் ஒரு பாத்திரமாக வருவது அருமை. சொல்லப்படும் (narration)விதமும் நன்றாக இருந்தது.இசையும் நன்று.

ஷேவ் செய்துக்கொண்டே கேட்கும் நணபன் வெட்டுப்படுவது,ஹரி கிணுகிணு மணியைத் தட்டிக்கொண்டே உள்ளே வருவது, முதலில் மோட்டர் சைக்கிள் பொம்மையைக் காட்டுவது......நன்று.

குறைகள்:

நண்பர்கள் பேசும் வசனங்களில் உயிரோட்டமே இல்லை.ஒப்பிக்கிறார்கள்.ஸ்கூல் டிராமா முக பாவங்கள்.ஓட்டதில் உயிர் குறைகிறது.ஒலிப்பதிவு இன்னும் சிறப்பாகச் செய்திருக்கலாமோ?சில வசனங்கள் புரியவில்லை. யூ டூப் காரணம்?

இதில் ஹெல்மெட்  திருப்பம் கம் சஸ்பென்ஸ்.இங்கு நிறைய ஹோம் வொர்க் தேவை.

அதை கடைசியில் காட்டி இருக்கலாம்.யூகிக்க விடாமல் கடைசி வரை  பார்ப்பவர்களை tender hookல் வைத்திருக்கலாம்.ரூமை விட்டுப் போகும் ஹரி  திருமப வந்து நண்பர்களை ரொம்ப பலமாக (”டேய் ரூமில் ஆவி இருக்கு... பாத்து”) எச்சரிப்பதாக டயலாக வைத்திருக்கலாம். இதுவும் “ரூமில்தான் ஏதோ நடக்கப்போகிறது” ”இவர்கள் ஏடா கூடாமாக மாட்டப்போகிறார்கள்” என்று திசைத் திருப்ப உதவும்.

ஹரிக்கு போன் செய்யும் போது ”நீங்கள் தொடர்பு கொள்ளும் நபர்  தொடர்பு எல்லைக்கு வெளியே இருக்கிறார்”.இதுதான்  புத்திசாலித்தனமான  கடைசி ஷாட். ஆனால் இதன் ஆடியோ  பளிச்சென்று இல்லை.பெரிய குறை.

படத்தின் லிங்க்:

அவன்,அவர்கள், அது....குறும்படம்-26-09-10

கலைஞர் டிவி/குறும்பட விமர்சனம்/26-09-10

இன்றைய (26-09-10) தினம் மூன்று குறும்படங்கள்தான் பார்க்க முடிந்தது. நடுவில் கேபிள் டிவி ஆபரேட்டரிடம் பவர் இல்லை.நான் தவற விட்டது பரிசு வாங்கிய படம். ஹெல்மெட் அணிவது பற்றி பிரசாரம்?

இன்றுடன்  சீசன் - 2 வில் அறிமுக சுற்று முடிகிறதாம். மொத்தம் 36 இயக்குனர்கள் கலந்துக்கொண்டார்களாம். அடுத்த வாரம் ”போட்டி” வாரம் ஆரம்பம்.அதாவது நடுவர்கள் சொல்லும் தலைப்பில் பட எடுக்க வேண்டும்.அது எந்த வகையிலும் இருக்கலாம்.சவால்தான்.தன் செல்லமானதை விட்டு மாத்தி யோசிக்க வேண்டும்.

குறும்படத்தை நான் ரசிப்பது ஒரு சுவராசியமான சிறுகதையை ரசிக்கும் மனநிலைதான்.

  போனவாரம்

இந்த வாரம்:

தலைப்பு: வியூகம்  இயக்குனர்: சுரேஷ் பாபு

ஒருவனை என்கவுண்டரில்”போட்டுத் தள்ள” மற்றொருவனுக்கு அசைன்மெண்ட் தரப்படுகிறது. வியூகம் அமைக்கப்பட்டு போட்டுத் தள்ளப்படுகிறான்.நாம் நினைப்பதுப் போல கட்ட பஞ்சாயத்து என்கவுண்டர் அல்ல.இது போலீசால் “off the record" ஆக செய்யப்படும் என்கவுண்டர்.

அதான் சஸ்பென்ஸ்ஸாம்????

இந்த சஸ்பென்ஸ் முடிச்சு சரியாகப் போட்டு அவிழ்க்கப் படவில்லை.இங்குதான் நிறைய ஹோம் வொர்க் செய்ய வேண்டும்.எல்லாம் ஒரே மூஞ்சியாக இருப்பதால் சற்று குழப்பம். சமோசா வெளிபக்கம் நல்லா இருக்கு. ஆனால் உள்ளே மசாலா சரக்கு சரியில்லை. ஓகே ரகம்.

தலைப்பு: இங்கேயும்  இயக்குனர்: எஸ்.கல்யாண்

ஒரு பெரிய காலனி. நடுவில் பூங்கா. குழந்தைகள் விளையாடுகிறார்கள்.

பூங்கா பெஞ்சில் வெள்ளைக் கலர் சூடிதார் அணிந்த பெண் (அந்த காலனியை சேர்ந்தவள்) உட்கார்ந்துப் பார்த்துக்கொண்டு இருக்கிறாள்.முகத்தில் வருத்தம்.பிளாஷ் பேக் ஓடுகிறது. வீட்டில் அப்பா, இவள் ஒரு பையனுடன் சுற்றுவதாகசந்தேகப்பட்டுத் திட்டுகிறார்.இவள் மறுக்கிறாள்.அடுத்து வேறு ஒரு நாள் பிளாஷ் பேக் ஓடுகிறது அன்றும் அப்பா சந்தேகப்பட்டு திட்டுகிறார்.அன்றும் அழுகையோடு மறுக்கிறாள். அதுதான் உண்மை.

பிளாஷ் பேக் முடிந்ததும் அவள் அதே வருத்தத்தோடு பேசுகிறாள் “காதல் தோல்வி அடைந்தால்தான் தற்கொலை செய்துக்கொள்வார்கள்.ஆனா நானோ யாரையும் காதலிக்கவில்லை என்பதை நம்ப மறுத்த அப்பாவின் சந்தேகத்தினால்  மனமுடைந்து தற்கொலைச் செய்து கொண்டு ஆவியாக இந்தப் பூங்காவில் உட்கார்ந்திருக்கிறேன்”.

ஆம் அவள் ஒரு  ஆவி.

பேசி முடிந்ததும் அவள் பக்கத்தில் ஒரு இளைஞன் வந்து உட்காருகிறான்.அவனைப் பார்த்து அதிர்கிறாள்.”ஆமாம்.. உன் மேல் இருந்த காதலால் உன் பிரிவைத் தாங்க முடியாமல் நானும் தற்கொலைசெய்துக்கொண்டுவிட்டேன்”.

வித்தியாசமான கரு. படபிடிப்பும் உயிர்துடிப்பாக இருந்தது.பழைய பேய் படங்களில் பேய்க்கு யூனிபார்ம் வெள்ளைப் புடவை.இதில் முதன்முதலாக பேய்க்கு வெள்ளை சூடிதார் துப்பட்டா.மாத்தி யோசித்திருக்கிறார் இயக்குனர்.

இசை நன்றாக இருந்தது.

எனக்கு ரொம்ப பிடித்தது இந்த குறும்படம்.

தலைப்பு: தலைப்புச் செய்தி  இயக்குனர்:பிரபாகரன்

செல் போன் மிஸ்யூஸ் செய்யப்படுவதால் நான்கு இளைஞர்கள்  ஒரு துணை நடிகையின் கொலையில் (அவளுக்கு தொல்லைக் கால்கள் வருகிறது) அனாவசியமாக விசாரிக்கப்பட்டு அடி வாங்குகிறார்கள்.

காமெடியாக எடுக்கப்பட்டிருந்தது.ஹீரோ நடிப்பு நன்று.

இவர்கள் மீது தவறில்லை என்று ரிலீஸ் ஆகி வரும் போது ஒருவர் “எனக்கு நிறைய பெண்களிடமிருந்து தொல்லைக் கால்கள் வருகிறது” என்று புகார் கொடுக்க பின்னணியில்  அந்தப் பெண்களை போலீஸ் பெண்டு எடுக்கும் குரல் கேட்கிறது.


இதுவரை பார்த்தப் படங்களை பற்றி யோசிக்கும் போது  சில படங்களில் உள்ளே ஓடும் முக்கியமான இழையை மெயிண்டன் செய்யாமல் விட்டு விடுகிறார்கள்.  அதற்குப் பதிலாக ஓவர் ஸ்டைல் காட்டுகிறார்கள்.

அடுத்து கடைசியில் டிவிஸ்ட் கொடுக்கும் படங்களில் டிவிஸ்டுக்கு உண்டானதை நன்றாக பில்ட் அப் கொடுத்து டிவிஸ்டுஐ அவிழ்க்க வேண்டும்.

இது பல படங்களில் மிஸ்ஸிங்.

கலைஞர் டிவி-19-09-10 - குறும்பட விமர்சனம்

 தொகுப்பாளினி கீர்த்தி இந்த வாரமும் அழகான உடையில் வந்து அசத்தினார்
 
எல்லாவற்றிலும் ”மெசேஜ்” எதிர்பார்த்து இன்னும் “நீர்குமிழி” காலத்தில் இருக்கும் கே.பாலசந்தர் இந்த வாரமும் ரீமோட் நீதிபதி. குறும்படம் எடுப்பவர்கள் கடைசியில் “ இந்தக் கதையின் மூலம் அறியப்படும் நீதி” என்று டைட்டில் போட்டு குறும்படத்தை முடிக்கலாம்.

நடுவர் தாத்தாக்கள்(மதன்/பிரதாப் போத்தன்) வழக்கமான தங்கள் சூட்டுகளில் வந்து விமர்சித்தார்கள்.அவர்களுக்கு புரியாவிட்டால் மறு முறை பார்க்கும் வசதி இருப்பது அவரது பேச்சின் இடையே தென்பட்டது.ஆனால் தொலைக்

காட்சிப் பார்பவர்களுக்கு அந்த வசதி இல்லை.

நேற்று கேடிவியில் “சீவலப்பேரி பாண்டி” படம் பார்த்தேன். ஒரு ஆச்சரியம் அதை இயக்கியவர் பிரதாப் போத்தன்.

போன வாரம் 12-09-10 நாளைய இயக்குனர்

போவதற்கு முன்.....

இந்த வாரம் ஒரு அப்பட்டமான காப்பி அடித்த குறும்படம் திரையிடப்பட்டது.பின்னால் பார்ப்போம்.

படம்: மாயக்கண்ணாடி இயக்குனர்: பிரின்ஸ்

சினிமாவில் முதலாளியாகவும் தொழிலாளியாகவும் (அதிகாரம்/அடிபணிதல்) ரோலில் நடித்தவர்கள் நிஜ வாழ்வில் அப்படியே எதிர்மறையாக இருப்பதுதான் கதை.

முதலாளியாக நடித்த துணை நடிகர் கூலி உயர்வு கேட்கும் தொழிலாளியாக நடித்த ஹீரோவை படபிடிப்பில் தவறாக காலில் எத்தி எல்லோரிடமும் திட்டு வாங்கி படபிடிப்பு முடிந்து, அதனால் குறைந்த பேட்டா வாங்குகிறான்.
படபிடிப்பில் தொழிலாளி என்ன வசனம் பேசினானோ அதே வசனத்தை முணு முணுத்தபடி  வீடு திரும்புகிறான்.

படபிடிப்பில் காலைப் பிடித்துக் கெஞ்சுவது மாதிரி உண்மையிலும் வைத்திருக்கலாம்.படம்தான் பார்க்கிறவர்களுக்குப் புரிகிறதே ஏன் கடைசியில் கோனார் நோட்ஸ்?

பிடித்திருந்தது.

 படம்: நண்பன் வாங்கி தந்த (லட்)டீ இயக்குனர்: மணிகண்டன்

நண்பர்கள் கூட்டத்தில் ஒருவன் காதலித்து ஒரு பெண்ணுடன் ஓடிவிட அதனால் மற்றவர்கள் போலீஸ் ஸ்டேஷனில் லத்தியால் பெண்டு எடுக்கப்பட்டு நொந்து போய் ரீலீஸ் ஆகிறார்கள். ரீலீஸ் கூடஇரண்டு குடும்பமும் சமாதானமாகி விடுவதால்தான்.அவர்கள் சமாதானம் இவர்கள்?

அடி வாங்கும் ஒருவன் “ பொண்ண கண்ணால கூட பாத்தது இல்ல” என்று சொல்லியபடி வெளிவருவது சூப்பர்.அவர் நடிப்பும் அருமை.லோகேஷன் மற்றும் படபிடிப்பு நன்று.பிடித்தும் இருந்தது.

 படம்: அன்பின் வலி அது இயக்குனர்:ஆளி பிரகாஷ்

இது நெட்டில் பார்த்த ஒரு ஆங்கில குறும்படத்தின் காப்பி.

பகல் நேரம். ஆடகள் புழக்கம் குறைவான வயல்வெளி. ஒரு திசையில் நாய் குரைக்கும் சத்தம் அதை தொடர்ந்து வலியில் கத்தும் குரல்.ஒருவர் அருவாளுடன் சத்தம் வந்த திசையை நோக்கி திகிலுடன் போகிறார்.கேமராவும் தொடர்கிறது.

மீண்டும் நாய் குரைக்கும் சத்தம் .

ஓலம் அதிகமாகி ஒரு இடத்தில் அகட்டிய கால்கள் காட்டப்பட்டு ரத்தம் வழிகிறது.அதைப் பார்க்கிறார் அருவாள் மனிதர். வாயடைத்துப்போய் ஓடி சோளக்கொல்லை பொம்மையில் இருக்கும் புடவைத்துணியை எடுத்து வந்து அந்த கால்களின் மேல் போத்துகிறார்.

சஸ்பென்ஸ் உடைகிறது.

அது ஒரு on the way  பிரசவம்.அகட்டிய கால்கள் பக்கத்தில் உள்ள பெண்மணி அப்போதுதான் பிறந்த குழந்தையை கையில் வைத்து இருக்கிறார்.

நடுவர்கள் யாரும் இதன் ஒரிஜனலைப் பார்த்ததாக தெரியவில்லை.இதற்கு கேமராவிற்கு உண்டான பரிசு கிடைத்தது.

படம்: 7 குறுக்கு 2 நெடுக்கு இயக்குனர்:அழகு ராஜா

சவ ஊர்வலத்தில்  ட்ரம்பெட்(requiem  என்னும் இறந்தவர்களுக்கு அல்லது அவர்களின் ஆத்மாவிற்கு வாசிக்கும்  இசை) வாசிக்கும் விளிம்பு நிலை இளைஞனின் காதல் தோல்வி கதை.

காதலிக்க ஆரம்பித்து அதை சொல்ல முடியாமல் தவித்து கடைசியில் தன் செல் நம்பர் கொடுத்து பேசச் சொல்கிறான். ஆனால் அவளிடம் இருந்து நோ ரெஸ்பான்ஸ்.அவள் தன் நண்பியின் திருமணத்திற்குப் போய்விடுகிறாள்.

இரண்டாவது  நாள்  ஒரு சவ ஊர்வலத்தில்  ட்ரம்பெட் வாசித்தப்படியே   வழியே போகும் போது  ஒன்றைப் பார்த்து அதிர்ச்சி அடைகிறான்.கை வாசிக்க முடியாமல் நடுங்குகிறது.அது ரோடில்  “நீத்தார் அஞ்சலி” போஸ்டரில்  இவள் காதலியும் அவள் நண்பியும் ஒரு விபத்தில் இறந்த செய்தியுடன்.

இவன் வாசித்துக்கொண்டிருக்கும்  சவ ஊர்வலம் அவளுடையதுதான்.

துக்கத்தில் வாசிக்க முடியாமல் போக இவனை துரத்தி விடுகிறார்கள்.  மறு நாள் இரவு தனியாக போய் அவள் சவக்குழியைத் தோண்டி  அவளுக்கு requiem வாசிக்கிறான்.

மற்ற சாவுகளை இவன் அலட்சியமாக பார்க்க இவள் சாவு இவனைப் படுத்துகிறது.

முடிவை யூகித்து விடலாம் என்றாலும் கரு வித்தியாசமாக இருந்தது.வழக்கமாக சாவு கானா பாட்டு இல்லாமல் டிரம்பெட் வித்தியாசம்.

தலைப்பு வித்தியாசமான தலைப்பு.பிணம் எடுக்கும் பாடையைக் குறிக்கிறது.அவனின் செல் காலர் டியூனும் “சாவு ட்ரம்பட் இசை”.சூப்பர்.

எல்லாமே நன்றாக இருந்தது. எனக்குப் பிடித்தது.

சிறந்த படமாக தேர்ந்தெடுக்கப்பட்டது நண்பன் வாங்கி தந்த (லட்)டீ.

கலைஞர் டிவி-குறும்படம் (12-09-10)

இந்த வாரம் குறும்படம் என்பதை விட “அருண் படம்”என்று சொல்லலாம். போட்டியில் கலந்துக்கொண்ட மூன்று குறும்பட இயக்குனர்கள் பெயர் அருண்.


தொகுப்பாளினி கீர்த்தி “கடல் கன்னி” உடையில் அசத்தினார். இந்த வாரம் சிறப்பு விருந்தினர் யாரும் இல்லை. என்னை யாரும் கூப்பிடவும் இல்லை(?).



போனவாரம் 5-9-10

படம்:பிரேதயா இயக்குனர்: அருண் வரதன்


சாவுக்குப் பிறகு வாழ்வு உண்டு என்று நம்பாத ஒரு பெண் மனைவியான பின் தன் சாவுக்கு(கொலை) பிறகு வாழ்வு உண்டு தெரிந்துக்கொள்வதுதான் கதை.


Life after death என்ற வித்தியாசமான கரு.


கணவன் தன் மூதாதையர் வாழ்ந்த வீடு என்று ஒரு அரதப்பழசான வீட்டிற்கு அழைத்துப்போய் ஒவ்வொரு மனைவிகளையும் கொல்கிறான். அவ்வாறே தானும் கொல்லப்படுவதை இறந்த பிறகு ஆவியாக பார்க்கிறாள்.


இயக்குனர் கேரளாவானதால் மனைவி பேச்சில் கேரள நெடி.வழக்கமான திகில் கதைக்கு உண்டான நடு ராத்திரி,மர்மமான சாவு,வெள்ளை உடை, புகை, கைகள்,”வீல்” கத்தல்.மாத்தி யோசிங்க..!


மேக்கிங்? ஏதோ மிஸ்ஸிங்.


பிரேதயா.... மனைவி பிரேதம் ஆனா பிறகு தெரிந்துக்கொள்வதாலா?


படம்: ஈசல் இயக்குனர்: அருண் ராஜா காமராஜ்


புரிந்துக்கொள்ளாத short tempered (காதலி " fuck" என்று பேசும் இடங்களில் வசனம் muting (டிங்)செய்யப்பட்டுள்ளது) காதலி, காதலனை “செத்துத் தொலை” என்று சபிக்க காதலன் மன உளைச்சலுக்கு ஆளாகி பைக்கில் வேகமாகப்போய் ஒரு முன் பின் தெரியாத இளைஞன் மீது மோதி முபிதெஇ சாகிறான்.காதலன் சாகவில்லை. சாவதற்கு சற்று முன்தான் அந்த முபிதெஇ செல்லில் ” ஐ லவ் யூ” (வேறு ஒரு பெண்)சொல்லி காதல் மலர்ந்த தருணம்.


இரண்டு காதல்களை மாறி மாறி குழப்பாமல் காட்டி அசத்தி இருந்தார். இறந்தவனின் காதலியை காட்டாமல் இருந்தது வித்தியாசம். ஆனால் ஏன் அவர் தமிங்கிலிஷ் பேசுகிறார்.


அருமையான படபிடிப்பு அண்ட் இசை.நடித்தவர்களும் அருமை.இறந்துப் போன காதலன் நடிப்பு அருமை.


எனக்குப் பிடித்தது.


படம்: பயத்திற்கு அப்பால் இயக்குனர்:கார்த்திக் பாலாஜி


Muscular Dystrophy (தசைகளை சுருங்க வைத்து மனிதனை இயங்கவிடாமல் முடக்கும் கொடுமையான நோய்) நோய் வந்த இளம் பெண் இனிமேல் வாழ்க்கை அவ்வளவுதான் என்று தன்னைப் ”போட்டுத்தள்ளும்படி”(???) கூலிப்படையிடம் பணம் கொடுக்கிறாள்.


ஆனால் அதன் தலைவன்(மிகவும் வயதானவர்) மறுக்கிறார்.பிடிவாதம் பிடிக்கிறார். அவரின் இளம் சிஷ்ய ரவுடிகள் அவரைப் படுத்தி ஒப்புக்கொள்ள வைக்கிறார்கள்.இரண்டு நாள் கழித்து அவளுக்கு அந்த நோய் இல்லை(தவறான டாக்டர் ரிப்போர்ட்) என்று தெரிய வருகிறது. உடனேகூலிப்படைத் தலைவரை சந்தித்து சொல்லவரும்போது அவர் இறந்துக் கிடக்கிறார்.


சரி அப்புறம்...?அங்கயே படம் முடிகிறது. பார்வையாளரின் யூகத்திற்கு சஸ்பென்ஸாக விட்டுவிடுகிறார்.


உயிர் துடிப்பான படத்தின் லோகேஷன்.ஆட்கள்.இசை.தற்கொலை செய்துக்கொள்ளாமல் தன்னைப்போட்டுத் தள்ளச்சொல்லும் பெண்ணின் வெகுளித்தனம் நன்றாக வெளிப்படுத்தப்பட்டிருந்தது.


எனக்குப் பிடித்தது.


படம்: சின்னக்களவாணி இயக்குனர்:அருண்


புளுகுண்ணி காதலன் எல்லாமே ஓசியில் வாங்கி காதலிக்கும் இவன் தனக்கென திருடும் செல்லும் திறந்த சாக்கடையில் விழுந்து நொந்துப்போவதுதான் கதை(?????).


செல்லை மையப்படுத்தி கதையை நகர்த்தி அது சாக்கடையில் விழுந்து நொந்துப்போவது போல் காட்டி இருக்கவேண்டும்.

சுமார்.


காமெடி:


குறும்படத்திற்கு இசையும் முக்கியம் என்று காரமாக பேசிய மதன் இன்றைய குறும்படங்களின் சிறந்த இசைப் பற்றி குறிப்பிடவில்லை.

குறும்பட விமர்சனம் - கலைஞர் டிவி - 05-09-10

குறும்பட விமர்சனம் - கலைஞர் டிவி - 05-09-10

                            
இந்த வார சிறப்பு விருந்தினர் - ஆர்.கே.செல்வமணி

இந்த வாரமும் ஓகே ரகம்தான்.

 போன வாரம்

1.படம்:"கானல்"  இயக்குனர்: சுப்பராஜு - காதல் கதை

இளம் புகைப்படக் கலைஞனின் காதல் தோல்வியடைந்து (காதலியின் அப்பா எதிர்ப்பு)தற்கொலை செய்துகொள்வதுதான் கதை.

புகைப்படக் கலைஞன் கேமரா மூலம் மென்மையாக சொல்லப்பட்டது. காதலன் காதலி நடிப்பு அருமை.வழக்கமாக ஸ்டைலான குர்தி சல்வாருடன் தலையை கலைத்து விட்டுக்கொண்டு காதில் பேஷன் நகைகள் கையில் செல்போன் இல்லாத புடவைக் காதலி வித்தியாசம்.

அடுத்த வித்தியாசம் கரும்பு சாப்பிட்டபடி காதலியுடன் உரையாடல்.பாடல் கூட உண்டு.வித்தியாசமாக "குட் நைட்" மஸ்கிட்டோ விஷம் குடித்து சாகிறார்.அதையே தன் காமிராவில் எடுத்துக்கொள்கிறார்.

எனக்குப்பிடித்திருந்தது.

"நீ கோபத்துல கூட அழகா இருக்க". ஈஸ்ட் இண்டியா கம்பெனி காலத்திலிருந்து காதலன் சொல்லும்  இத்துப்போன வசனம். மாத்தி யோசிங்கப்பா..?

2.படம்:"என் உயிர் சக்தி"  இயக்குனர்: ராகேஷ் - காதல் கதை

அம்மா இல்லாத வளர்ப்பு மகனின் முதலாம் ஆண்டு திருமண நிறைவு.அன்று எப்படி தன் காதலை ஜெயித்து அப்பாவிடம் சம்மதம் வாங்கிக் காதலி சக்தியை (பக்கத்து வீடு) திருமணம் செய்துக் கொண்டேன் என்பதுதான் கதை.

காதலியை யார் என்பதை சஸ்பென்ஸாக வைத்து கடைசியில் காதலி ஒரு ஆண்.இது ஒரு ஒரினப்புணர்ச்சிக் காதல்.ரொம்ப போல்டு தீம்.இயக்குனரின் முதல் குறும்படம்.

என்னால் ரசிக்க முடியவில்லை.காரணம் ஒரு அதிர்ச்சி மதிப்பு(shock value)மற்றும் டிவிஸ்டுக்காக வைக்கப்பட்டுள்ளது.

அப்பாவிற்கும் மகனுக்கும் நடக்கும் உரையாடலில் பின்னணியில் ஏன் காந்தி படம் fade outல்  காட்டப்படுகிறது.

3. படம்:"ரவ்லெட்"(Roulette) இயக்குனர்:ஸ்ரீகாந்த் - பொது

ஒருவன் தன்னைப் புத்திசாலியாக நினைத்துக்கொண்டு ஏமாறுவதுதான் கதை.இது பிரிட்டிஷ்
எழுத்தாளர் சகியின் சிறுகதை. நான் சிறுவயதில் படித்தக் கதை.

பார்க்கில் ஒரு இளைஞன் உட்கார்ந்துக்கொண்டு பேப்பரில் கிராஸ் வேர்டு புதிர் போட்டுக்கொண்டிருக்கிறான்.பக்கத்தில் ஒரு வயதானவர்.சிறிது நேரத்தில் அவர் எழுந்துப் போய்விடுகிறார்.

அந்த இடத்திறகு வேறு ஒரு இளைஞன் வந்து "ஊருக்குப் புதுசு" என்றும், லாட்ஜில் தங்கி இருந்து சோப் வாங்க வெளியே வந்து லாட்ஜின் அட்ரசை மறந்துவிட்டதாக சொல்லி நூறு ரூபாய் பணம் கேட்கிறான். நம்ப முடியாமல் சில கேள்விகள் கேட்டு கடைசியில் வாங்கிய சோப்பைக் காட்டினால் நூறு ரூபாய் பணம் தருவதாக சொலகிறான்.

அதையும் தொலைத்துவிட்டதாகச் சொல்கிறான். பணம் தர முடியாது என்று சொல்ல அவன் போய் விடுகிறான்.அவன் போனதும் அவன் உட்கார்ந்த இடத்தின் பெஞ்சுக்குக் கிழே ஒரு கேரி பாக்கில் ஒரு லைப்பாய் சோப்பு கிடக்கிறது.

ஆஹா... இவனைத் தவறாக நினைத்துவிட்டோமே வருத்தப்பட்டு  அவனைத் தேடிக் கண்டுபிடித்து சோப்பை கொடுத்து நூறு ரூபாய் பணமும் கொடுக்கிறான்.

கொஞ்ச நேரம் கழித்து அந்த வயதானவர்  வருகிறார்.அவன் அருகில் வந்து எதையோ தேடிவிட்டு, அவனைப் பார்த்து " லைப்பாய் சோப்பு ஒன்னு கேரி பாக்கல வச்சுருந்தேன்.."

நன்றாக எடுக்கப்பட்டு இருந்தது. குறும்படத்தைச் சொந்த கதையில் எடுப்பது நல்லது.

4. படம்:"சிக்கிக்கு சிக்கிக்கிச்சு"  இயக்குனர்: ராஜேஷ்குமார்  -காதல் கதை

கதை அழகில்லாத இளைஞன் ஒருவனுக்கு ஒருத்தியை  காதலித்து தன் பைக்  பில்லியனில் அவளை உட்கார வைத்துக் கொண்டு ஊர் சுற்ற வேண்டும் என்பது லட்சியம்.

எந்தப் பெண்ணும் சிக்கவில்லை...ஒரு நாள் ICICI கிரெடிட் கார்ட் விறகும் பெண் பூஜா போனில் பேச அவளையே காதலிப்பதாக சொல்கிறான்.அவளும் ஒகே என்கிறாள்..இரண்டு நாள் கழித்து அவளை ஆவலோடு ச்சந்திக்கிறான்.ஆனால் அவள் கருப்பாக கண்ணாடி அணிந்து அவலட்சணமாக இருக்கிறாள்.

நொந்துப் போகிறான்.இருந்தும் ஓகே என்கிறான்.பூஜா தன் அழகைப்  பல முறைச்சொல்லிஉண்மையாக காதலிக்கிறாயா என்று கேட்கிறாள்.ஆமாம் என்கிறான்.

அவனின் நேர்மையில் மகிழ்ந்துப் போய் "நான்  பூஜா அல்ல..!" என்று சொல்ல பின்னால் உண்மையான பூஜா (முதல் பூஜாவே பெட்டர்)) வருகிறாள்.உன் காதலின் நேர்மையை டெஸ்ட் செய்யத்தான் இது மாதிரி நாடகம் என்கிறாள்."நீ பாஸ் செய்துவிட்டாய் அதனால் உன்னைக் காதலிக்கிறேன்" என்கிறாள்.

நீதி???

சிக்கி "திடீர்" நேர்மை செட்டாகவில்லை.சுமார் படம்.

சிறப்புப  படமாக  என் உயிர் சக்தி தேர்ந்த்தெடுக்கப்பட்டது.

நாளைய இயக்குனர் - குறும்பட விமர்சனம்-29-8-10

இந்த வாரக் குறும்பட விமர்சனம்: 29-8-10 ( போனவாரம்-22-8-10 )

சிறப்பு நடுவர் டைரக்டர் சுசீந்திரன் (நான் மகான் அல்ல).முதன் முதலாகவெண்ணிலா என்கிற ஒரு பெண் இயக்குனர் இதில் கலந்துக்கொண்டுள்ளார்.

எல்லாமே காதல் கதைகள்(?).எல்லாம் சுமார் ரகம்.

படம்:தேவதை  இயக்குனர்: முருகப்பன்

காதலன் காதலி சந்திக்கிறார்கள்.பேச்சு இயல்பான நகைச்சுவையோடு ஆரம்பிக்கிறது.படிப்படியாக சீரியஸ்ஸாகி காதலியைச் சுட்டுக்கொல்கிறான் காதலன்.தேவதை "வதை" செய்யப்படுகிறாள்.காரணம் காதலி தன்னிடம் உண்மையாக இல்லை.கொஞ்சம் நேரம் கழித்து அவன்  நண்பன் அவனைப் பார்க்க  வருகிறான். “ஏண்டா இப்படி” பதறுகிறான். அவனையும்  தலையில் சுட்டுக்கொல்கிறான்.

நண்பன் அவளின் கள்ளக்காதலன்.இருவருரையும் அருகருகில் கிடத்தி விட்டுப்போய்விடுகிறான். மறு நாள் செய்தித்தாளில் “காதலன் காதலியை சுட்டுத் தன்னையும் சுட்டுக்கொண்டு தற்கொலை” என்று தலைப்புச்செய்தி.

துரோகம் செய்யும் நண்பனையும் காதலியும் மாட்டாமல் எப்படி கொலைச்செய்வது என்று திரில்லர் வகையில்கொண்டுப் போய் இருக்கலாம். சம்திங் மிஸ்ஸிங்.தொழில் முறை கொலையாளிபோல் .....ஓவர் ஸ்டைல்.

படம்:இப்படியும் சொல்லலாம் இயக்குனர்:சந்திரன்

தன் காதலியை (பார்க்கில் உட்கார்ந்திருக்கும்) முதன் முதலில் எப்படி பிரபோஸ் செய்தேன் என்று நண்பனிடம் விவரிக்கும்போது  காட்சியாக விரிந்து காதலி ஓகே ஆவதுதான் கதை.

 குழந்தைகள் விளையாட்டுப் போல் “நான்தான் காதலனாம்.நீ பார்க்கில் புக்கு படிச்சிட்டு உட்கார்ந்திருப்பயாம். நான் உன்ன பிரபோஸ் செய்வேனாம்” என்பது போல் டிராமத்தனம். பாரதியார் கவிதைகள்(?) வேறு சொல்லி பிரபோஸ் செய்கிறார்.பழைய காலத்துப்படம் போல காதலி ரொம்பவும் தனியாக பார்க் பெஞ்சில் உட்கார்ந்து  புத்தகம் படித்துக்கொண்டிருக்கிறார்.

பிரபோஸ் ஓகே ஆக   அவள் கழுத்தில் கேமராவை மாலையாகப் போடுவது நச்.ரசிக்க முடிந்தது.

படம்:அந்த மூன்று நாட்கள் இயக்குனர்:வெண்ணிலா

ஒரு இளைஞன் மூன்று நாட்கள் நண்பர்களோடு குட்டிச்சுவரில் உட்கார்ந்துக்கொண்டு ரோடில் போகும் பிகரை “கரெட்”(காதல்!)  செய்ய நம்பிக்கையோடு பாடுபடுகிறான்.கடைசியில் அந்த பிகர் நண்பனுக்கு ”கரெக்”டாகிறது இவனுக்கு ஆகவில்லை.யூகித்துவிடலாம்.

இளைஞர்களின் உருவத்தை முதலில் பார்க்கும்போது இங்கும் “மதுரை”யா? பகீர் என்றது.படம் ஒரு இடத்தில் முடிந்துவிடுகிறது.அதற்குப்பின்னும்  எதற்கு கோனார் நோட்ஸ்?

இளையராஜாவின் பாடல் பின்னணி இசை பயன்படுத்தப்பட்டுள்ளது. Self confidence தானே வேண்டும்? ஏன்  confidence என்கிறார் நாயகன்(?).வசனங்களில் உயிரே இல்லை.

படம்:WOO ...WOOOOO இயக்குனர்:பாலா

இதுவும் அதே ரகம்தான். ஆனால் கடைசியில் சற்று தேவலை.

___________________________

இயக்குனர்கள் தங்களுக்கு பிடித்த “பிகர்” சப்ஜெக்டயே இயக்குவதை முதலில் நிறுத்த வேண்டும்.அப்படி இயக்கினால் வித்தியாசமாக இருக்க வேண்டும்.

கிழ் வரும் குறும்படத்தில்(பழையது)நகைச்சுவை அருமையாக கையாளப்பட்டுள்ளது.எல்லா பாத்திரங்களும் அருமை.

குறும்படங்கள்-கலைஞர் டிவி

முடிந்தவரை வாரவாரம் கலைஞர் தொலைக்காட்சியில்
“நாளைய இயக்குனர்”நிகழ்ச்சியில் திரையிடப்படும் படங்களை பதிவில் விமர்சிக்கலாம் என்று எண்ணுகிறேன்.
 
ஒரு பாமரன் பார்வையில்தான் விமர்சனம்.டெக்னிகல் தெரியாது.

குறும்படங்கள் எனக்குப் பிடித்தமான ஒன்று. காரணம் சற்று வித்தியாசமாக  ஒரு மாதிரி “கு(து)று கு(து)று”வென்று இருக்கும்.முழு நீளப் படங்கள் போல் அரைத்த மாவையே அரைப்பது கிடையாது.

இதைப் பற்றிய முந்தைய பதிவு:குறும்படம் 

முந்திய பதிவில் விட்டுப்போனது. வசனங்கள் தெளிவாக இருக்க வேண்டும்.இங்கும் “சுடுதல்”உண்டு.வருத்தமான ஒன்று.

வாரம் 22-08-10:

தலைப்பு:ஆயுதம் -  இயக்குனர்: ராம்

கதை: பல பேருக்கு டென்ஷன் கொடுக்கும் கட்டப் பஞ்சாயத்து ரவுடி தலைவனுக்கு டென்ஷன் கொடுக்கும் ஆஸ்துமா வீசிங் படுத்துவதுதான்.இவனுக்கு  துப்பாக்கி எவ்வளவு அவசியமோ அவ்வளவு  அவசியம Nebulizer.ரவுடி கையில் எப்போதும் குவார்ட்டர் கட்டிங் இருக்கும். இதில் Nebulizer.

வித்தியாசமான  சூப்பர் கரு. முடிவை முதலிலேயே யூகித்து விடலாம்.

இசை  மற்றும் எடுத்த விதம் அற்புதம்.முடிவில் ஆஸ்துமா வந்த டென்ஷனில துப்பாக்கிக்குப் பதிலாக Nebulizer  வைத்து சுட்டுக்கொண்டுவிடுகிறார்.

எனக்கு ரொமப் பிடித்தது.

தலைப்பு:மகுடி- இயக்குனர்: பாலா

கதை:கார் திருடன்  ஒருவன் காரில் போகும் ஒருவரை பைக்கில் அடிக்கடி தொடர்ந்து போக்குக்காட்டி(மகுடி ஊதுவது மாதிரி) அவரின் காரைத் திருடுகிறான். 

நிறைய அவுட்டோர்.இன்னும் கூட விறுவிறுப்பு & லாஜிக் கொண்டு வந்திருக்கலாம்.கடைசியில் காரில் திருடன் பாட்டுப்போடுவது படத்தின் தீவிரத்தை நீர்க்க வைக்கிறது.

காட்டில் தொடரும் போது வரும் காட்சிகள் ஹாலிவுட் திகில் படத்தை நினைவூட்டுகின்றன.

தலைப்பு:Short Film - இயக்குனர்: மணிவண்ணன்

கதை:சிடியில்(நெட்டில்?) படம் பார்க்கும் ஒருவன் இறந்துவிடுகிறான்.அவனின் ஒரு கண் டீபாயில் விழுந்துக்கிடக்கிறது.போலீஸ் துப்பறிகிறது.துப்பறியும் போலீசும் ஒரு கண் வெளியே வந்து இறந்துவிடுகிறார்.

ஒரு முறைப் பார்த்தால் மறுமுறை பார்க்கக் கூடாத படமாம்.இப்படி ஆரம்பிக்கும்போது திகிலாக இருந்தது.(பார்த்தால் கண் வெளியே வந்துவிடுமாம்).திகில் ஏற்படுத்தியதே இயக்குனரின் வெற்றிதான்.

குறை ஒன்றும் இல்லை.எனக்குப் பிடித்திருந்தது.ஆனால் ஏதோ ஜப்பானியப் படம் பாதிப்பு என்று  நடுவர் பிரதாப் சொன்னார்.

தலைப்பு:அன்று ஜாலி.இன்று காலி - இயக்குனர்:ஷரத்

கதை:வீட்டில் கொடுத்த பணத்தை((EB கட்டணம்) ”ஜாலி” செய்துவிட்டுபோலீசுக்கு மாமூல் கொடுத்ததாக பொய் சொல்கிறான்.நம்பிய பெற்றோர்கள் மறுநாள்கொடுத்த பணம் உண்மையாக (இன்றும் ஜாலி செய்ய கிளம்பும் போது)டிராபிக் போலீசில் மாட்டி மாமூல் கொடுத்துக் ”காலி” ஆகிறான்.

அட... நம்ம கதை! பிடித்திருந்தது.

நகைச்சுவை படம்.பையன் விடியா மூஞ்சியாகவே இருப்பது அற்புதம்.ஆனால் அப்பா பொருத்தமாகவே இல்ல்லை.அதுவும் அம்மாவிற்கு ஏற்ற அப்பாவாக.
போலீஸ்-பையன் மோதல் யதார்த்தமாக இருந்தது.ஆனால் பணம் கிடைத்ததும் தன்  மனைவிக்கு போலீஸ் போன் செய்வது செயற்கை.

நடுவர்கள் ரசிக்காதது ஆச்சரியம்!

என்னிடம் குறும்படத்திற்குண்டான  இரண்டுகதைகள் உள்ளன. அவை:

1. பேய் வீட்டில் விழுந்த செல்போன்

2.சாந்தி சலூனுக்கு வந்த மகேஸ்வரி

என்னை அணுகலாம்.

குறும்படங்கள் -கலைஞர் டிவி-நான்--DUSTER

குறும்படங்கள்:
குறும்படம் என்றால்  ”ZIP File” உடனே எனக்கு ஞாபகம் வருகிறது.பெரிய அல்லது சின்ன கருவை 3 நிமிடம் முதல் 12 நிமிட அவகாசத்தில் அடைத்து  பார்வையாளனுக்கு புரியும் விதத்தில்,சுவராசியமாக  கதையின் ஆத்மா கெடாமல் கொடுக்க வேண்டும் என்பது சவாலான வேலைதான்.

கிட்டத்தட்ட ஒரு பக்க சிறுகதைதான். 20-25 நிமிடத்தில் எடுக்கப்படும் குறும் படங்களை என்னால அவ்வளவாக ரசிக்க முடியவில்லை.மாக்சிமம் 10 தான். கொசுறாக 2 நிமிடம் சேர்த்து 12 நிமிடம்.

குறும்படத்தைப் பார்க்கும்  பார்வையாளர் ஒரு வித stressஓடு பார்க்க வேண்டியுள்ளது.ரொம்ப ஷார்ப்பாக இருக்கவேண்டும். கண் காது இரண்டையும் இறுக்கமாக வைத்துக்கொண்டு கவனம் சிதறாமல் பார்க்க வேண்டியுள்ளது.

காராணம்?

நிறைய suggestive shots வரும்.Two minutes Noodles மாதிரி விரைவாக முடிந்துவிடும்.ஒவ்வொரு பிரேமும் முக்கியம்.முழு நீள திரைப்படத்தில் (Feature film) போடும் கோனார் நோட்ஸெல்லாம் இங்கு போட மாட்டார்கள்.
ஹாலிவுட் படம் மாதிரி படம் போகும் போக்கிலேயே புரிந்துக்கொள்ள வேண்டும். கேண்டிட் கேமராவை ஒத்த ஷோ.

முக்கியமாக இயக்குனரின் புத்திசாலித்தனத்தை படத்தில் கண்டுக்கொள்ள வேண்டும்.பார்த்துப் பார்த்து நிறைய பயிற்சி எடுக்கவேண்டும்.கலைஞர் டிவியில் வரும் நடுவர்களே சில சமயம் படம் முடிந்ததும் ஒன்றும் புரியாமல்”திரு திரு”வென விழிப்பதைப் பார்க்கலாம்.

குறும்படம் என்றாலே டாக்குமெண்டரி என்ற நினைப்பிலேயே பாதிபேர் இன்னும் இருக்கிறார்கள்.காரணம் பல குறும்படத்தின் முடிவில் நீதி/போதனை
இருக்கும். நான்  சுத்தமாக ரசிப்பத்தில்லை.

சங்கம் தியேட்டரில் ஹெல்மெட் பற்றியும் சிகரெட் பற்றியும் இரு நகைச்சுவை குறும்படங்கள் காட்டப்படும்போது தியேட்டரே அதிரும்.இதே ஹெல்மெட் பற்றி எடுக்கப்பட்ட  ஒரு குறும்படம் நெட்டில் ரசிக்கும்படியாக எடுக்கவில்லை.

இப்போது மீடியா வளர்ந்துவிட்டதால்  யூ டூப்பில் விதவிதமாக பூந்து விளையாடுகிறார்கள்.ஆனால் நிறைய நீதி போதனை படங்கள்.கொஞ்சகாலம்  முன்பு மாற்றுத் திறனாளிகளை கருவாக வைத்து   குறும்படம் எடுத்து அரைத்தமாவேயே அரைத்தார்கள்.

உதாரணம் 1: ஒருவர் கடையில்  கூலிங்கிளாஸ் நிறைய மாடல்கள் பார்த்து கடைசியில் ஒன்றைத் தேர்ந்தெடுத்து அணிந்து எழுந்து தன் குச்சியில் தட்டி தட்டி நடந்துபோவார்.

உதாரணம் 2:டிவியில் ஒட்டப்பந்தயத்தை ஒருவர் ரொம்ப ஆரவாரமாக விசில் அடித்து ரசிப்பார்.அவரே ஒடுவதுபோல் பிரமிப்பார்.படம் முடிவில் கேமரா அவரை நோக்கித் திரும்போது அவர் வீல் சேரில் உட்கார்ந்தி்ருப்பார்.இது மாதிரி நிறைய தொலைக்காட்சியில் பார்த்துள்ளேன்.

சில விளம்பரப் படங்கள் பார்க்கும் போது இவை குறும்படங்கள்தான் என்று தோன்றும்.முடிவு முக்கால்வாசி நகைச்சுவையாக இருக்கும்.

குறும்படத்தில் எனக்குப் பிடித்தது யதார்த்தமான கதாபாத்திரங்கள்.Mood lighting.
வித்தியாசமான கருக்கள்.வளமான கற்பனைகள்.எடுக்கும் விதம்.எந்த வித சமரசங்களும் செய்துக்கொள்ளாமை.புது முகங்கள்.நம்பகத்தன்மை.புது காற்றைச் சுவாசித்தல்.Small is always beautiful.

இவற்றுக்குத்தானே குறும்படமே?

கலைஞர் டிவி:

கலைஞர் டிவியில் கருணைக் கொலை(அம்மா?) பற்றிய ஒரு குறும்படம் ரொம்ப அற்புதமாக இருந்தது. இதில் முக்கியமானது நடித்த நடிகர்கள்.படத்தின் ஆழம். பாரதிராஜா படங்களில் இந்த மாதிரி ஆழமான காட்சிகளைப் பார்க்கலாம்.இயக்குனர்: மகேஷ் பெரியசாமி.அடுத்து “கை” என்ற குறும்படம். இதில் சில குறைகள்இருந்தாலும் வித்தியாசமான கரு.பிறகு நிகழ்கதவு.

(ஒரு கொடுமை:மூன்று மாதம் முன் பார்த்த படங்களைப் பற்றிய draftபதிவு அழிந்துவிட்டது )

குறைகள் என்று பார்த்தால் இயக்குனரின் விடலைத்தனம் மற்றும் stylishஆக எடுக்கிறேன் என்று படத்தின் ஆழத்தைக் கோட்டை விடுவது.நகைச்சுவைக் குறும்படங்கள் எடுக்காமல் இருப்பது.நடிக்கும்  சில பெண்கள் தமிங்லிஷ் (“யேன்ன பாண்ணிட்டிருகீங்க”)பேசுவது.சினேகா பேசும் தமிழ் மாதிரி.உடைந்து உடைந்து வரும்.

சில குறும்படங்கள் quiz programme  மாதிரி எடுத்து ”என்ன சொன்னேன் கண்டுபிடியுங்கள்” ரகம்.மண்டையை கிர் அடிக்க வைக்கும்.
 
நான்:
கலைஞர் தொலைக்காட்சியில் ஞாயிறு ஒளிபரப்பாகும் குறும்படங்களைப் பார்க்கையில், ஒவ்வொரு முறையும் ஞாபகம் பல வருடங்கள்  பின்னோக்கிப் போகிறது.

நான் பார்த்த முதல் குறும்படம் (டாக்குமெண்டரி)குடும்பக்கட்டுப்பாடு பற்றிய 10 நிமிட அனிமேஷன்.அடுத்தது (இதுவும் அனிமேஷன்) புகை வண்டிதொடரில் அபாயச்சங்கலி அனவசியமாக இழுத்து நிறுத்தினால் ஏற்படும்தொல்லைகளை
விளக்குவது.

ஒரு கிராமத்தான் இழுத்து நிறுத்தும்போது இஞ்சின் பல பெருமூச்சுகளை புகையாக விட்டுக்கொண்டு முகத்தையும் சுருக்கிக்கொண்டு சடாரென்று நிற்கும்.கிராமத்தான் விசிலடித்துக்கொண்டே இறங்கிப்போவார்.இன்னொன்று பொது சொத்துக்களை நாசப்படுத்துவதால் ஏற்படும் விளைவுகள்.

இதெல்லாம் அப்போதைய தூரதர்ஷனில் அடுத்த நிகழ்ச்சி ஆரம்பிப்பதற்கு முன் ஒரு filler ஆகப் போடுவார்கள்.

கிழே 'DUSTER"என்ற குறும்படம் (18 நிமி்டம்?) இரு பகுதிகளாக வருகிறது.பகுதி-2ம்பார்ககவும்.சின்ன குறைகள் இருக்கு.முக்கிய குறை நீளம்.

முதல் பகுதியிலேயே முடித்திருக்கலாம்.நீளத்தையும்
டாக்குமெண்ட்ரித்தனத்தையும் குறைத்திருக்கலாம்.

குழந்தைகள் யாரும் கேமராவைப் பார்க்கதது ஆச்சரியம்!

இரண்டு முக்கியமான விஷயங்களை கொண்டுவந்திருந்தால் படத்தில் எமோஷனல் எபெக்ட் வந்து இருக்கும்.

அது என்ன  இரண்டு விஷயங்கள்? சொல்லுங்கள் பதிவர்களே?